20 janar 2017 – Marrëveshja për Asociacionin/Bashkësinë e komunave me shumicë serbe shënon themelin e mosmarrëveshjes së dialogut të ndërmjetësuar nga BE-ja mes Kosovës e Serbisë. Parimet e përgjithshme për themelimin e Asociacionit/Bashkësisë, të miratuara në gusht të vitit 2015, sollën më shumë polemika dhe shkaktuan një krizë të pashembullt në Kosovë. Përkrahësit e mbështetën atë si mjet për t’i integruar serbët e Kosovës veriore në juridiksionin e Kosovës dhe për ta avancuar normalizimin e marrëdhënieve midis dy shteteve. Megjithatë, Asociacioni është bërë çështje e ndërlikuar në praktikë. Shumë segmente të shoqërisë kosovare e refuzojnë një Asociacion të këtij lloji. Gjykata Kushtetuese vendosi që ai është në kundërshtim me frymën e Kushtetutës dhe qeveria ngurron ta zbatojë atë derisa Serbia të paraqesë plane të qarta për tërheqjen e institucioneve paralele që ajo i financon në Kosovë. Serbët e Kosovës e shikojnë Asociacionin nga një këndvështrim shumë praktik: si instrument shpërblimi për integrimin e dhimbshëm në Kosovë dhe zëvendësim për institucionet që largohen e financohen nga Serbia. Serbët u frikësohen reagimeve të shqiptarëve, që janë parë gjatë 24 muajve të fundit, ndihen të padëshiruar në Kosovë dhe shqetësohen se Beogradi do t’i braktisë së shpejti. Komuniteti serb – pala më së shumti e prekur nga dialogu dhe më së paku e përfshirë në të – dëshiron që dialogu për normalizim të vazhdojë, dëshiron që marrëveshja e koalicionit të respektohet dhe kërkon tranzicion të qetë nga sistemi serb në atë kosovar. Lexo më shumë
